YLOCO

Cunada: "Filipino ti lenguaje nasional" ngem cunac met: "Iloco ti lenguaje ti nasion."

Name:

Raymundo Addun, profesor iti economia ken Español, roosevelt college, mannurat Joel B. Manuel, maestro iti lenguaje, fisica ken kemica, deped, mannurat

Monday, January 10, 2005

YLOCO

Cacailian, daytoy ti umoctayo amin a mangtunton iti umiso, historical ken responsivo nga reintelectualisasion ti dilatayo a Samtoy. Umaycayo ket ibinglayyo dagiti nabalitocan a pampanunot ken addang nga agservi a raniag ti Ilocano tapno aglayag cas napabaro, napapigsa ken sibibiag a lenguaje a mabalin nga iyatar cadagiti malalaki a dila iti sangalubongan.

Mapagtutungtongan dagiti pacasecnan ti Iloco cas maysa a dila a manarimaan nga aglasat iti reintelectualisasion, pannacapapapintas, evolusion manipud iti cajon a limitasionna iti agdama gapu iti dictar dagiti adda iti bileg nga awanan met ngarud iti calintegan a mangmuli iti daytoy a pagsasao agsipud ta macuna a tagaruar dagitoy.

Dagitoy ngamin a fuerza a nangbeckel iti daytoy a pagsasao, indictarda dagiti napoliticaan nga ahenda a mamagcaycaysa cadagiti dila iti sangcapuruan a Filipinas, maysa a reacsionario a panangtunton iti cunada a "nasionalismo"; ngem iti kinaagpaysona, maysa daytoy a panangtaldeng cadagitoy a dila ket saandan a macatayactac iti lubong para iti globalisasion.

Ita, makitatayo ti nalidem ken macapadanag a pacapayan ti pagsasaotayo nga inramraman dagiti agcuncuna a "maka-Filipino." Impilit dagitoy a tinuccol ti nasimbeng ken narimat a masacbayanna gapu iti panangidictar dagitoy no ania ti rumbeng a maaramid iti daytoy pagsasao a dida met pagsasao, daytoy "Samtoy" saanen a Saomi ditoy no di ketdi cayatda pay a biangan ti panagdur-asna.

Maysa a dackel a camali a datayo nga Ilocano, simmurot iti dictar ti Instituto ti Lenguaje Nasional a macayasan ti alfabetotayo nga Ilocano babaen iti pannacaiccat ti letra c, v, f, ñ, ch, x, ken z. Nacaladladingit a saan a naipilit dagiti editores iti cangrunaan a bunannagtayo a defendaran ti tradision ti literacy ti Lenguaje Ilocana.

Ngarud, naiccat dagitoy a letra, nausar laeng ti k iti lugar ti c, ti b iti lugar ti v, ti p iti lugar ti f, ti ni iti lugar ti ñ, ti ts iti lugar ti ch, ti ks iti lugar ti x, ken ti s iti lugar ti z. Castoy ti agtultuloy ita a mapaspasamac iti dandani isuamin a pagsasao iti sangcapuruan. Napalaus a castoy ti mapaspasamac ita iti Tagalog a pinagparangda a Filipino ket no castoy laeng, saanto a macaruc-at daytoy a pagsasao iti limbo a nangigarangugongan kencuana dagiti ultra-Nasionalista nga agpanggep a mangitag-ay iti daytoy. Ti nasakit, inraman dagitoy amin a dila iti sangcapuruan a casla ketdin cucuada amin dagitoy nupay agparparang laeng a "Tagalista" dagitoy.

Ita, no cayattayo nga Ilocano a ti Iloco agbalin a pagsasao nga addaan tawa a tuman-aw iti lubong ken casta met nga addan iti pundasion iti Astronesiano a capupuonna a pinasingdat ti pannacaalina iti Hispanico a tradision ken pananggaw-atna iti capadasan ti Lumaud, panawenen tapno lumacsidtayo iti dana ti perdision a pangiturturongan ti dila a "Filipino" cadatayo. Panawenen a pabacnangentay ti pagsasaotayo saan laeng a babaen iti panangisublitayo iti impaidamda a ramen ti nabacnang a Latino a tawidtayo cadagiti Español no di pay ketdi ti panangsacdotayo iti capadasan dagiti Ingles ken Americano.

Dagitoy ngarud ti tungtongan iti daytoy a blogsite:

Reintelectualisasion
Estandardisasion
Nainliterarioan a Panagsukisoc ken Kinaescolar
Pannacausar ti Iloco kas Pagsasao ti Panangisuro
Pannacaisuro ti Iloco
Ken Dadduma Pay

Maawiscayo a makipartisipar babaen cadagiti dillaw ken singasingyo.

JOEL B. MANUEL







6 Comments:

Blogger rva said...

Nagsayaaten daytoy, gayyem JBM!

Ala, ngarud ta agiinnadaltay' man. Napintas daytoy blogging system ketdi nga aramatentayo ta mabalinmo, gayyem, ti agikabil iti kakadua a makiblag ditoy kas members daytoy a blog.

Planok met idi pay ti mangi-setup koma iti maysa a forum para iti diskusion ti Philippine Literature nangruna ti Iloko Lit. Nasayaat ta rinugiamon daytoy maipapan iti lenguahe, gayyem JBM. ituloykonto latta siguro met ti maipapan iti literatura no adda waya ken adda resources a pag-maintain iti server.

Umaycayo ngaruden, cacabsat ken cacaduami ida!

January 10, 2005 at 8:03 PM  
Blogger joel said...

gayyem rva,

mayat daytoy a pangexperimentuantay man kadagiti materiales iti balabalaentayo a napapintas nga Iloco.

ala, gayyem icastam ta blogmo iti literatura ta ne, magulo met dita dap-ayan ti iluko.com ngamin itan.

joel

January 10, 2005 at 8:39 PM  
Blogger ANIB said...

mayat man daytoy, abalayan.
caano cadi a marugian ti tungtungan.
quet awisendacaminto met a.
Diay press releasyo para Vannaoag, cuna ni Apong Cles, nascen a maifinal ti aldaw a tungtongan quen daguiti agsarita, sacbay a maipablaac.

January 13, 2005 at 7:28 PM  
Blogger manongoli said...

this is great!! i thought i was alone in thinking that ilocano is hemorrhaging and going the way of the dinosaurs because of inane policies by decrepit politicians in Manila (hehe don't get me started).

panpanunotek gamin nga no awan macaaramid ti estandardisation ti iloco ket urayen no siak ti mangirugi, uray no saanak unay nga nalaing a agsurat ti iloco, manipud nga di maisursuro a lenguahe idiay pilipinas. casla caniam ket cayatko nga mareintelectualise iti iloco-- masapul nga ibasa a masapa ken maitranslate dagiti agsasabali nga subject.

anyway, it's good to see kindred spirits in cyberspace.

good luck.

ps. can i have permission to link your blog to my website (not finished yet)?

January 16, 2005 at 11:43 AM  
Blogger joel said...

manongoli,

sure, apo. ilinkyo latta daytoy ta kaduaendakam man kadagiti gannuat a pagsayaatan ti Iloko.

ana kadi ti nagan ti websiteyo, apo?

joel

January 17, 2005 at 5:36 AM  
Blogger Randy Ryan said...

Sir, I was wondering if you can help me with the story "Kurditan Samtoy." Can you help me out with this? Thank you.

August 5, 2008 at 12:57 AM  

Post a Comment

<< Home